Inspirira STEAMen zortzi edizio aurrera eraman ondoren, egiteke dagoen erronketako bati heldu nahi izan diogu oraingoan: eskuratutako ezagutza eta esperientzia Lehen Hezkuntzako irakasleekin partekatzea. Beti pentsatu izan dugu irakasleak funtsezko zutabea direla ikasleek STEAM arloekiko duten interesa sustatzeko eta, hau, genero-ikuspegi integratzaile batekin egiteko. Horretarako, gida bat sortu dugu irakasleentzat. Bertan, emakumeek STEAM arloetan duten egungo egoera aztertzen da, genero-arrakala eragiten duten arrazoietako batzuk erakusten dira (bereziki, STEAM arlo batzuetan), eta zenbait kausatan sakontzen dugu, hala nola genero-estereotipoetan, autokontzeptuan, erreferenterik ezan edo STEAM ikasketa eta lanbideen ezjakintasunean. Horrez gain, eskoletan gertatzen dena eta gure jardueran, Lehen Hezkuntzako irakasle gisa, egunerokoan zer egin dezakegun aztertzen dugu; ezkutuko curriculuma, irakasleen joerak eta aurreiritziak azpimarratuz.
Gida doakoa da, Creative Commons lizentziapean argitaratua, eta euskaraz, gaztelaniaz eta ingelesez dago eskuragarri. Irakurri, zabaldu eta zuen gogoetak gurekin partekatzera animatzen zaituztegu!
Menu
